مهرجان المانجو فى الإسماعيلية الذى أقيم يوم الجمعة، وتمتد فعالياته حتى اليوم، كان مهرجاناً لنشر البهجة ولتشجيع التصدير والاحتفال بأجمل مانجو على سطح الكوكب، بتشجيع من المحافظ الجميل الذى يعشق العمل لا الشو اللواء شريف بشارة، وبمشاركة من أهل الإسماعيلية عشاق الأصفر، المانجو والنادى الإسماعيلى.

وبمناسبة أروع أنواع المانجو الذى تتميز به عروس القنال، المانجو العويسى، أنقل لكم كلمات أستاذ التجميل الشهير د. أحمد عادل نور الدين عن العويسى، تخيلوا لما خبير تجميل وخبير مانجو كمان يتحدث عن العويسى، يقول د. أحمد:

العويسى.. وما أدراك ما العويسى!!

المانجة العويسى فى مصر ليها حدوتة.

زماااان واحنا صغيرين كانت المانجة الحلوة هندى منشاوى أو فونس أو تيمور.. غير كده يبقى أصناف بلدى إلا ما ندر. ماكانش فيه حاجة اسمها عويسى. أتذكر كنا بنتسابق الصبح على صوت مانجاية مستوية على أبوها وهى بتزغرد بين أوراق الشجرة قبل ما تدب بلطف على الأرض.. حاجة تانية خالص.

قُصره.. جه واحد مصرى أصيل فى السبعينات اسمه حتى مصرى جداً.. الحاج عويس، قام بتطعيم شجرة هندى منشاوى مصرى أصلى بفرع شجرة مانجة من بلاد الهند والسند.. استنى يشوف قدرة ربنا من خلال الأرض الطيبة بتاعة مصر، كانت النتيجة نوع جديد فيه شكل ولون وحجم وجاذبية مانجة الهند مع نكهة وحلاوة وطعامة وريحة المانجة المصرى. الراجل الله يرحمه ويجازيه عنا كل خير كان عنده عزيمة وإرادة قوية وقدر يحافظ عليها وعمل لها براندينج محترم.. فكانت المانجة العويسى اللى انتشرت فى ربوع مصر بسحرها ورشاقتها وحلاوتها وقدرتها على إسعاد خلق الله وإمدادهم بطاقة إيجابية فاخرة.

يمتاز شجر المانجة العويسى بالكرم الزايد.. موش بس إنتاجها غزير (متوسط الإنتاج من شجرة بتشوفها الشمس كويس ومحمية من رياح الخماسين يصل إلى ١٠٠ كيلوجرام) دي كمان مابتريّحش سنة وتطرح سنة زى الفونس والتيمور، يعنى إنتاج مستمر.. والثمار اللى لم تلقح جيداً وتفضل صغيرة فى الحجم برضو تاخد كمية عظيمة من الحلاوة وهى اللى بنقول عليه الفص.. العويسى كمان من كرمها الموسم بتاعها طوييييل.. من نص يونيو لنص سبتمبر موجودة بوفرة.. وطبعاً الإسماعيلاوى يكسب.

لو عاوز بقى تستمتع بالعويسى صحيح تاكلها وهى جامدة ولما تقطعها بالسكينة بالحنين كده وانت منتظر بشوق ريحتها توصل وتظبط مزاجك هتلاقى إن كلها من الداخل لون واحد.. كده تبقى عملت الصح قبل ما تبقى أغمق شوية فى القلب.. يعنى استوت بزيادة شوية.. إذا استوت قوى وطريت وده وارد طبعاً اعمل عصير عويسى يدوى وهتعرف ساعتها يعنى إيه عصير مانجة أصلى.

المانجة العويسى بتاعة مصر هى أصل الكرم والسكر الزيادة.