«العالم بيتغير يا موع موع، بيتغير بطريقة مذهلة، وانتم قاعدين بتخلفوا كتيير وترغوا كتير وبتضيعوا وقتكم فى ما لا يفيد». قالت «أم ميئش» وهى حزينة.

سأل «موع موع»: هو إيه اللى حصل؟

قالت «أم ميئش»: قول إيه اللى ما حصلش.. الكون بيتحرك بسرعة مهولة وانتم بس مش بتشركوا فى تغييره ولا انتم عارفين إيه اللى بيحصل فيه، ده انتم كمان عاملين زى أهل الكيف نايميييييييييييين ومأنتخيييييييييين ومستكنيصييييييييييييين فى جهلكم. أنا مالى أنا ومال الشغلانة دى. ليه يا ربى ما بين بلاد الدنيا ييجى حظى فى البلد دى، وليه يا ربى ما بين كل البشر، توقعنى مع واحد مجنون مهتم بالسياسة والاقتصاد والعك ده؟ ليه مكانش صاحبى من اللى بيسمعوا أغانى وبيستمتعوا فى التفاهات. أهه شغلى بالى وطلع لى عينى معاه.

بعد جولة التبكيت دى، كان لازم «موع موع» يفهم إيه الموضوع.

قالت أم ميئش: تعرف أهم تطورات بتحصل فى العالم الآن إيه؟

قلت: لأ.. ما هو انت اللى مطلعة، قوليلى.

اعتدلت أم ميئش ثم نظرت لى نظرة قرف وقالت: أقولك.. بص يا سيدى..

أولاً أمريكا ستكون أكثر دول العالم إنتاجاً للنفط لتحل محل السعودية بعد اكتشافات أمريكا المتعاظمة فى مجال النفط الصخرى. كل ده بيحصل وانتم قاعدين.

ثانياً، انت عارف إن موازين الثروة فى العالم بتتحول مثل بندول الساعة من أقصى يسار الخريطة إلى أقصى يمين الخريطة بما يعنى أن مراكز تركز الثورة ستنتقل من أمريكا الشمالية وأوروبا إلى وسط وجنوبى آسيا خلال الأربعين سنة المقبلة. وأن عدد الأفراد الذين يملكون مليون دولار فيما فوق سيزيد فى آسيا عن أولئك الموجودين فى أمريكا الشمالية خلال 15 سنة. كل ده بيحصل وانتم قاعدين.

ثالثاً، الصين تحديداً ستعبر محطتين مهمتين جداً: الأولى أن حجم استثماراتها الخارجية ستفوق حجم الاستثمارات القادمة إليها، بما يعنى أن الصين ستكون صاحبة الدور الأكبر فى تحديد مسار الاستثمارات العالمية بدءاً من عام 2015. المحطة الثانية أن الصين لأول مرة فى تاريخ العالم المعاصر سيكون اقتصاد الصين، محسوباً بالقدرة الشرائية (Purchasing-power parity)، متقدماً على الاقتصاد الأمريكى لتصبح الصين الأولى عالمياً. كل ده بيحصل وانتم قاعدين.

رابعاً، آسيا، حتى مع استبعاد الصين، ستكون ثانية بعد الولايات المتحدة فى الإنفاق العسكرى، متخطية بذلك الاتحاد الأوروبى. كل ده بيحصل وانتم قاعدين.

خامساً، هل تعرف يا «موع موع» أنت وأقرانك من مستخدمى التكنولوجيا أن مبيعات التابليتس (Tablets) ستزيد على مبيعات الكمبيوترات الشخصية واللاب توبس. كل ده بيحصل وانتم قاعدين.

سادساً، هل تعلم أن العالم يتجه الآن نحو الإنترنت بما أثر كثيراً على مشاهدته للتليفزيون أو شرائه للصحف لدرجة أن المقابل المالى للدعاية على الإنترنت ستفوق فى 2015 فى أمريكا وأوروبا المقابل المالى من التليفزيون والصحف المطبوعة وإعلانات الشوارع مجتمعة؟ كل ده بيحصل وانتم قاعدين.

سابعاً، هل تعلم أن فى 2015 سيزيد عدد خطوط تليفونات الموبايل على عدد البشر، يعنى عدد البشر هيكون حوالى 7 مليارات وفيه حوالى 7.2 مليار خط تليفون موبايل فى العالم؟ كل ده بيحصل وانتم قاعدين.

ثامناً، هل تعلم يا «موع موع» أن دولة «الفيس بوك» سيزيد عدد سكانها على أولئك الذين يعيشون فى الصين؟ كل ده بيحصل وانتم قاعدين.

«أم ميئش»، القطة بتاعتى، قالت كلمتها الأخيرة ثم تثاءبت، وراحت نامت.

واكتشفت إن كل الكلام اللى قالته ده مكتوب فى العدد الأخير من مجلة الأيكونوميست. تأكدت من سلامة نقلها، وحمدت ربنا إن صخرة الدويقة وقعت على فاشوش، وإن مؤمن زكريا اتنقل للأهلى.

يلا، تصبحوا على خير.