إياد نصار يروي تفاصيل فشل زواجه الأول وأسرار عمله في مصر

روى الفنان إياد نصار، تفاصيل حياته الشخصية وأسرار فشل زواجه الأول والخوف من خوض التجربة للمرة الثانية، إضافة الى كواليس بداية عمله في الدراما المصرية.

قال إياد، في تصريحات إذاعية: "كان طموحي إني أدخل سوق الدراما في مصر، لأن المنافسة عالية جدًا، والكل كان متوقع أني أرجع بلدي بعد سنة أو اتنين، ولكني كنت حاسس إن ربنا راسم لي حاجة هنا وإن فيه مجهود لازم أعمله".

أضاف: "لسه بتعلم وبراقب لغاية دلوقتي، أنا مراتي مصرية يعني دخلت البيت المصري وبقى عندي تفاصيل وتنويع بصري أكتر، ولسه فيه مناطق في الشغل مدخلتش عليها ولو دخلت عليها بيكون غرور مش ثقة، لأن خبرتي في الحياة في مصر لسه مش كبيرة".

وعن تفاصيل انفصاله عن زوجته الأولى، قال: "زواجي الأول كان حب جامعة وفشلت فيه مع أننا أصدقاء وبيننا أبناء، وبحمل نفسي جزء من المسئولية باللي حصل أكيد مش هحمل الطرف التاني المسئولية كاملة، وقعدت سنين متردد في أني أرتبط تاني ولكني حبيت المرة دي بوعي، ويهمني أني أعرف أتكلم مع الطرف اللي قدامي وأعرف أقول لها كل أسراري، ومفيش بني آدم شافني بالطريقة اللي أنا بيها قدام مراتي شيماء، أنا قدامها أقرب شخص لي".

واصل: "أنا بقول لها كل حاجة حلو أو وحش، وبقول عيبي وبغيره، مراتي بتستحملني في حاجات كتير، إحنا بنعرف نسمع بعض ومتطلباتنا مش سطحية من بعض ومعتقدش إنها هتتغير، وكبرنا كفاية إننا نثبت قوانينا".

وعن علاقته بوالده، أوضح أن والده كان يرفض دخوله الوسط الفني، وعاش العديد من الأزمات بسبب محاولته إثبات نجاحه لوالده.

تابع: "خبرتي مختلفة تمامًا عن خبرة أبويا، وفيه وقت من الأوقات كان شايفني ضايع وقال إن مصيري يا مقتول يا مسجون، وكان شايف إني خذلته ولكن في النهاية أنا عرفت أنجح في الفن وده كان مغامرة وكنت مراهن على حياتي".

أضاف إياد نصار: "علاقتي أنا ووالدي مكنتش أحلى حاجة، ومكنش فيه حنية ولما قابلني من قريب حضني فأنا قلقت، هو كتوم جدًا، وأنا حسيت إنه عايز يقولي إنه جه عليّ كتير، ولكن أنا استوعبت لما بقيت أب وعندي أولاد في سن المراهقة، ومقدرش ألومه على طريقة تعامله معي".

قد يهمك أيضــــــــــــــــًا :

إياد نصار يُشوق متابعيه لفيلمه الجديد ويُعلِّق

إياد نصار يتحدث عن شخصيته في فيلم «من أيام الجيزة»